Ricevo e pubblico, con piacere, una bella poesia scritta dal giovane Riccardo Pugliese, dedicata al suo paese: Panaia.
m.v.
Panaja
(Panaia di Spilinga, agosto 2016)
‘U suli d’u munti staci nescendu,
l’aceji e ‘i cicali vonnu cantari,
‘u silenziu, chianu si ndi stac’jendu,
si senti ‘u ventu e ‘u profumu d’u mari.
Jà intra, ‘nta chiju vecchju pagghjaru,
‘i mani esperti stannu a lavurari:
mani pruvati, ch’assai fatigaru,
chi mai, però, si stancaru d’amari.
Ma l’occhji guardanu ‘u ceuzu luntanu
chi janca e russa ndi faci ‘a mura:
cu sapi cu fu, ‘nto tempu cristianu
chi chistu annestò, ‘nta sta terra scura!
E quandu o’ tramuntu ‘u suli è luntanu
beji l’isuli si fannu avvidiri:
Lipari, Panarea, e ‘u vulcanu
chi da’ vucca ‘u fumu faci nesciri.
Fuma, fuma, caru vecchju Furcanu,
ca certu a tia no’ t’abbaca fumari!
Ch’u suli, partitu d’u munti arcanu,
arred’a tïa si vaci a curcari.
St’arburu anticu ‘a storia mi cunta:
‘i Greci sti semi a nui purtaru,
‘i Bizantini ‘i ficiru chjanta,
e ‘i Normanni c’u passiun’i crisciru,
e nui, figghji ì sta beniditta terra
‘i frutti ì sti pianti antichi pigghjamu
‘nte tempi ì paci e ‘nte tempi ì guerra
st’oliu e vinu boni ndi gustamu.
Quandu ‘a sira è scura, e senza vuci,
d’u campusantu chi faci spagnari,
ì Messina vidimu beji ‘i luci
chi duci amuri ndi vonnu mandari.
‘Ntantu sona tamburello, battenti
e ‘a duci lira, chi faci scialari;
e nui, misi tornu a stu focu ardenti
dassamu ‘i penseri e jam’a ballari!
Mò, terra mia, io t’aiu a dassari
terra antica, e china d’allegria,
aundi l’anima volerrìa turnari
e pi nommu u si ndi vaci chjù via!
Riccardo Pugliese
